tri xiu goro
"Three Little Pigs" a Pandunia baxa. be kitaba de thethedorn.
🐷🐷🐷
a tele pas, mama goro ten tri xiu goro. ama da no ten bas yam to don to damen. un den a damen es bas lau, da miti damen to dunia, to damen soka semen su gol a jiu.
un me goro no suka gung. da pul no vol gung e bina se su dom de gan gazo. du me goro ya xiu max di suka gung, e da bina se su dom de moka kane. pos vo, damen cante e danse e van a pan un dia.
tri me goro ya teza gung a pan dia, e da bina se su dom de petra. da es bala dom, ki ten tanur e duman tubo. da rupa ka da bil bala di lipa a la masim bala hava.
a pos den, volfe move a karibu dau, a ki la tri goro ya dom. da vide gan gazo di dom, e da aroma la goro in la dom. da fikir la goro es bon yam, e da su boke ya kai sana yo sui.
🐺
la volfe ya darba la mun e loga: "xiu goro! xiu goro! cing kai la mun! cing kai la mun!" ama la xiu goro ya vide la volfe su dai hande a la cavi kong. da javabu: "no! no! no!" pos, la volfe fa xou se su dante e loga: "mi hava e mi hava e mi parca tu su dom!"
da hava e da hava e da parca la dom! la volfe fa kai se su boke to masim, ki da bil, ama un me goro ya ga, to dom de du me xiu goro.
la volfe zoku a xiu dau. da pas du me dom, ki be sana va moka kane. da vide la dom. da aroma la goro a in. da su boke ya kai sana yo sui, a sabu de da fikir damen es bon yam.
da darba la mun, e loga: "xiu goro! xiu goro! cing kai la mun! cing kai la mun!" ama la xiu goro vide la volfe su gona ore a la cavi kong. damen javabu: "no! no! no!" la volfe xou se su dante e loga: "mi hava e mi hava e mi parca tu su dom!"
🌬️
da hava e da hava e da parca la dom! volfe teste kape la du goro a sam zaman, ama da vol max ka bas, e da kape siro goro! da su dai boke be klus to siro xe de air. la du xiu goro ya ga, masim rapide ka damen su fute bil kino damen.
la volfe teste kape damen a xiu dau. da karibu kape damen, ama damen lai to petra dom e kelele kai la mun e a cen de la volfe ya bil kape damen.
la tri xiu goro ya fobi. damen san la volfe ya vol yam damen. damen es poli poli fobi. la volfe no le yam a pan den, e da su yam vol be kai no toler bil. da zai bil aroma la pan tri goro a dom. da san la tri xiu goro es bon yam xe.
la volfe fa darba la mun, e loga: "xiu goro! xiu goro! cing kai la mun! cing kai la mun!" ama xiu goro vide la volfe su xiu huang yen a cavi kong. damen loga: "no! no! no!" la volfe xou se su dante e loga: "mi hava e mi hava e mi parca tumen su dom!"
da hava e da hava. da hava e da hava. e da hava, e da hava, e da hava, ama da no bil parca vo dom. a fin, da poli fatige di hava. sun da no bil max hava. da ting to xux, e da xiu fikir.
vo es max ka bas. la volfe marca a gola a furi. da plan da lai pas la duman tubo e da yam xiu goro to xam yam. ama a dur de da eskale to dom su cati, la xiu goro ya sana un poli garma di hogo e loka un dai sui ketel a hogo. a pos, a sam zaman de la volfe lai to dipe de tanur, la xiu goro fa kai la ketel... ayo! volfe be padu to in de poli garma di sui!
🔥
la xiu goro fa loka un daka a la ketel. la volfe be boli a ketel! e la tri xiu goro ya yam da to xam yam.